مابوش عقول
......
قالوا : المَحَافرْ جَاهِزِينْ..
خلِّى الكَسَلْ
وعَلى الٲقَلْ..
تَخْرُجْ وتعْمَلَّكْ قَطِينْ
آذارْ كَمَلْ
ونَيسَانْ قَرَبْ
وعَادْ ٲرْضَنا كُلّهْ صَلَبْ
وكَم يامَنَاضِحْ بالشِّعَبْ
ٲطْرَافْ مَدْكُوكَةْ دَكُوكْ
واطْرَافْ مَشْبُوكَةْ وَبَلْ
قُلنَا..اسْمَعُوا
المَسْئَلَةْ ماهِيشْ كَسَلْ
لٲنّ العَمَلْ ٲسْهلْ عَمَلْ
المَشْكِلَةْ..
مافيشْ بَتُولْ
ولابَقَى اثُوارْ بالصّبُولْ
إلّا حِمَارْ..
واحِد بِكُلّ المَنطِقةْ..
حِمار رَكِيكْ
مِن دُونْ دَبَلْ
مَحْرُومْ مِن المَاء والحَسِيكْ
والسّحْبْ مِثْلَ المَلعَقةْ
إذا سِحِبْ...
ودَخَلْ بِوبّالِي حِنِبْ
وإلّا نَصَلْ
وبَعد التّلِيمْ..
التِّلمْ يَشْبِهْ الكَفَلْ
وإذا دِعِسْتْ...
على النِّبَالْ
يرجع يَمِين..
ويرجَع شِمالْ
وما تَدري إلا وقَدْ بَرَكْ
ويَبدا البَتُولْ ..
يهتِفْ يقولْ
ساعة : بِجَاه المُؤتمرْ..
ساعة : بِجَاه المُشتَركْ
ٲمّا الحِمَارْ..
بَرَكْ.. ومازادْ ٲحْتَرَكْ
قُلنا : اقْطُبوا
وخَلّوا السّرَكْ
جَالِس تِخَذلَفْ بالرْجُلكْ
مالكش مناص..
ولا انا شَعذُرَك.
قال البَتُول :
واايَا ٲهِيلْ..
موو عَاجَلكْ
قَانا اسْٲلَكْ
كيف اعْمَلكْ؟
ماعَدْ بَقَى إلّاقَلِيلْ
وبانْجَرّبَ الحَلّ البَدِيْلْ
هاتْ مَحْفَركْ
ٲمّا الحِمَار..
سَابِطْ .. بَرَكْ
مِثْلَ الشَلَكْ
قُلنا .. خَلاصْ
ٲجْلِسْ بِجَنبُهْ لَلْعَشِي...
وهاتْ خيْمَتكْ
ولاَنْتَ تِخَافْ مِن عَوْمَتكْ
كمَا الحذرْ...
لعَ الطِّويْهِشْ يٲكُلَكْ
هذا خَبَرْ..
تشتوا نِبَكِّرْ بالحِجَنْ
وندي الٲصابع للحِكُول…
مابوش عقول!!!
*******
محمد أحمد الدِّيَم
٢٠١٧/٣/٢٣م
ليست هناك تعليقات:
إرسال تعليق